Spanja: Zgjedhjet, kusht për integrim

Kur tashmë ka marrë presidencën e radhës së Bashkimit Europian, Spanja përforcon qëndrimin ndaj shtetit ligjor për të konsoliduar demokracinë nëpërmjet zgjedheve të pranuara nga të gjitha palët. Ambasadori i akredituar në vendin tonë, Manuel Montobbio, i ka kujtuar ekzekutivit shqiptar se duhet të plotësohen një sërë kushtesh për të qenë në të ardhmen pjesë e BE. “Metamorfoza juaj duhet të ecë në drejtimin e duhur. Duhet të respektohen standardet siç janë zgjedhjet. Ato duhet të jenë të pranueshme nga të gjitha palët. Një tjetër çështje ka të bëjë me administratën, e cila duhet të bazohet mbi meritat e personelit, lufta kundër korrupsionit është një tjetër pikë, ndërsa duhet të përballeni me procesin e liberalizimit të vizave, ku duhet të arrihen standardet teknike, duke pasur parasysh një grup monitorimi që do të mbërrijë së shpejti në Shqipëri,” u shpreh Montobbio.

Ambasadori spanjoll vijoi apelin ndaj qeverisë shqiptare dhe sa i takon perspektivës së saj për të qenë pjesë e BE, pas marrjes së pyetësorit. Ai pohoi se nuk duhet thjesht të jepet përgjigjia e pyetjeve, por sesa është e gatshmë është Shqipëria për t’i përmbushur ato. “Ju jeni të mirëpritur në BE, por për këtë duhet të jeni shtet, shtet në kuptimin e plotë të fjalës. Ky process zgjerimi është si bashkëveprimi elektrik. Keni disa tela që duhet të funksionojnë. Ju duhet të adoptoheni me kërkesat e BE, pra të lidhni kabllot. Në rast se vendoset kjo lidhje, atëherë kjo procedurë do të jetë e njejtë me vendet e tjera,” u shpreh ai.

back | 03.02.2010